தமிழுக்கு தொண்டு செய்வதை கடமையாக எண்ணி வாழ்ந்தவர்கள்!!

தமிழுக்கு தொண்டு செய்வதை கடமையாக எண்ணி வாழ்ந்தவர்கள்!!

தமிழுக்காக மலேசியாவில் தம்மை ஈகம் செய்த தமிழறிஞர்களின் எண்ணிக்கை ஒரு வட்டத்திற்குள் வரையறுத்திடலாகாது.தங்களின் வாழ்நாளின் பெரும் பகுதியை மொழிக்காகவும் இனத்திற்காகவும் ஈகம் செய்த தமிழறிஞர்களில் தமிழ்க்குயிலார் என போற்றப்படும் ஐயா கா.கலியபெருமாளும் இறையருட்கவிஞர் என புகழப்படும் ஐயா சீனி நைனா முகம்மதும் தனித்துவமானவர்கள்.

இந்நாட்டில் தமிழும் தமிழனும் தனித்துவ அடையாளத்துடன் அவனது பண்பாட்டையும் பாரம்பரியத்தையும் மொழியல் உணர்வுடன் மெய்மம் கொண்டு வாழ அவ்விருவரும் தங்களின் எழுத்துகளில் இனமொழி உணர்வை அமுர்தமாய் படைத்தனர் எனலாம்.

நம் மொழியின் இலக்கணமும் இலக்கியமும் அடுத்த தலைமுறைக்கும் அதன் மரபு தொலையாமல் கொண்டு செல்லப்பட வேண்டும் என்பதற்காக அது சார்ந்த நூல்களை மாணவர்கள் முதல் ஆசிரியர்கள் வரையும் மட்டுமின்றி எழுத்தாளர்களும் அதனை பின்பற்றும் வகையில் படைத்துள்ளதோடு தமிழ் ஆர்வாலர்களுக்கும் வழிகாட்டியாக பல்வேறு படைப்புகளை இவர்கள் மலேசிய தமிழினத்திற்கு விட்டுச் சென்றுள்ளனர் என்பது குறிப்பிடத்தக்கது.

தமிழ் மீது கொண்ட காதலாலும் தமிழன் என்னும் உயரிய உணர்வாலும் வாழும் காலத்தில் நம்மினத்திற்கும் மொழிக்கும் பங்களிக்க வேண்டும் என்பதில் இவ்விருவரும் தங்களை ஈடுப்படுத்திக் கொண்டனர்.மேலும்,தமிழுக்கு தொண்டு செய்வதை தங்களின் வாழ்வியல் கடமையாகவே எண்ணி வாழ்ந்தனர்.

தமிழக்குயிலார் கா.கலியபெருமாள்

பாவேந்தர் பாரதிதாசனால் அளிக்கப்பட்ட தமிழ்க்குயிலார் என்னும் தனிச்சிறப்புடன் தன் வாழ்நாள் முழுவதும் தமிழுக்கு தொண்டாற்றிய ஐயா தமிழ்க்குயில் கா.கலியபெருமாள் உலகத் தமிழர் பண்பாட்டுக் களஞ்சியத்தை உருவா

க்கிய பெருமைக்குரியவராவார்.

மலேசிய திருநாடு பெற்ற மணித்தமிழ் அறிஞர்களுள் தமக்கே உரிய தனிப்பாணியும்  தனிமுத்திரையும் கொண்ட தமிழறிஞர்தான் நமது தமிழ்க்குயிலார் கா.கலியபெருமாள்.

ஓய்வுப்பெற்ற  தமிழாசிரியரான தமிழ்க்குயில் கா.கலியபெருமாள் அவர்களின் சேவையை பாராட்டும் வகையிலும் அதனை அங்கீகரிக்கும் வகையில் நாட்டின் “தோக்கோ குரு” (Tokoh Guru) என்னும் நல்லாசிரியர் விருது வழங்கப்பட்டது என்பது குறிப்பிடத்தக்கது.

நாட்டில் தமிழறிஞர் எனவும் தன்முனைப்புப் பேச்சாளராகவும் அறியப்படும் தமிழ்க்குயிலார் தன்னை ஒரு பகுத்தறிவாதியாகவும் நிலைநிறுத்திக் கொண்டார்.பேராக் மாநிலத்தின் கம்பார் நகரிலுள்ள கம்பார் தோட்டத்தில் 19.08.1937இல் பிறந்த தமிழ்க்குயிலார் தனது 73வது வயதில்  ஜூலை 8ஆம் தேதி 2011இல் தனது தமிழ்மூச்சை நிறுத்திக் கொண்டார்.

1960களில் பாவேந்தர் பாரதிதாசனால் “தமிழ்க்குயிலார்” என்னும் சிறப்பு விருதை பெற்ற தமிழ்க்குயிலார்க்கு அமெரிக்க உலகப் பல்கலைக்கழகம் டாக்டர் (முனைவர்)  பட்டம் வழங்கிச் சிறப்பு செய்தது என்பது ஒவ்வொரு மலேசிய தமிழர்க்கும் பெருமிதமானது.

மலேசியாவின் மூத்த தமிழ் எழுத்தாளர்களில் ஒருவரான இவர் 1982இல் மலேசியத் தமிழ்  எழுத்தாளர்களின் தேசியப் பேரவையை தோற்றுவித்தார்.மாநில வாரியாக இயங்கி வரும் தமிழ் எழுத்தாளர் சங்கங்களை ஒன்றிணைக்கும்  நோக்கத்தில் இப்பேரவையை அவர் அப்போது உருவாக்கினார் என்பது குறிப்பிடத்தக்கது.

அப்பேரவையின் அமைப்புத் தலைவராகவும் பேராக் மாநில  எழுத்தாளர் சங்கத் தலைவராகவும் பொறுப்பேற்றிருந்த தமிழ்க்குயிலார்  அவரது தலைமைத்துவத்தின் கீழ் மாநில நிலையிலும் தேசிய நிலையிலும் எண்ணற்ற எழுத்தாளர்களை உருவாக்கியுள்ளார்.மேலும்,மலேசியாவில் தமிழர் சடங்கு முறைகளை முறையாக வடிவமைத்தும் கொடுத்தார்.இவரது “பக்தியும் பகுத்தறிவும்” என்னும் கேள்வி பதில் பகுதி மலேசியர்களிடையே பெரும் வரவேற்ப்பை பெற்று தந்தது.இக்கேள்வி பதில் அக்காலக்கட்டத்தில் மலேசிய நண்பனில் இடம் பெற்றது குறிப்பிடத்தக்கதாகும்.

தமிழ் முரசுவின் மாணவர் மணிமன்ற மலரில் (1953) தொடங்கிய இவரது முதல் படைப்பு தொட்டு அவர் வாழ்ந்த காலம் வரை சுமார் 200க்கும் மேற்பட்ட சிறுகதைகள்,500க்கும் மேற்பட்ட கட்டுரைகள் உட்பட 300க்கும் மேற்பட்ட கவிதைகள்,உரைவீச்சுகள் மற்றும்  நாடகங்களை எழுதியுள்ளார் என்பது அவர் வாழ்ந்த காலங்களின் நினைவுகளின் சிறப்பாகும்.

மேலும்,தமிழ்க்குயில் மற்றும் ஆசிரியர் ஒளி எனும் இதழ்களையும் வெற்றிகரமாக நடத்திய இவர் நூற்றுக்கும் மேற்பட்ட தமிழ் இலக்கண,இலக்கிய நூல்களையும் எழுதியுள்ளார்.மேலும்,80க்கும் மேற்பட்ட தமிழ்ப்பள்ளிக்கூடப் பயிற்சி நூல்களையும் எழுதி தமிழ்ப்பள்ளி மாணவர்களின் தமிழ் மொழி வளர்ச்சிக்கு பங்காற்றியுள்ளார்.தமிழாசிரியர் சங்கத்தில் பல பொறுப்புகள் வகித்து நற்பணியினை செம்மையாக மேற்கொண்ட தமிழ்க்குயிலார்க்கு அச்சங்கம் “தொண்டர்மணி”விருது கொடுத்து பாராட்டியது.தமிழ்ப்பணிகளுக்கிடையில் அவர் ஈப்போவில் தாம் வாழ்ந்த காலத்தில் வள்ளலார் அன்பு நிலையத்தை அமைத்தும் தொண்டாற்றினார்.

இவரது நூல்களில் தமிழர் பண்பாட்டுக் களஞ்சியம்(1000 பக்கங்களுக்கு மேலான தொகுப்பு நூல்),நீத்தார்கடன் நெறிமுறைகள்,சிறுவர் செந்தமிழ்க் களஞ்சியம்,அடிப்படைத் தமிழ்,தமிழர் திருமண முறைகள்,பொன்மணிச் சிந்தனைகள் ஆகிய நூல்கள் உட்பட மேலும் பல நூல்கள் தனித்துவம் மிக்கவைகளாக அக்காலக்கட்டத்தில் திகழ்ந்தன என்பது குறிப்பிடத்தக்கது.

மலேசிய படைப்பாளர்களில் தலைசிறந்த ஒருவராக விளங்கிய தமிழ்க்குயிலார் ஐயா கலியபெருமாள் தனது வாழும் காலத்தில் அவர் தமிழுக்கு ஆற்றிய சேவைக்கும் அவரது தனித்துவமான படைப்பிற்காகவும் பல்வேறு விருதுகளையும் பரிசுகளையும் பெற்றுள்ளார்.

அவற்றில் செந்தமிழ்க் கலைஞர்,திருக்குறள் மாமணி,தனிநாயக அடிகள்,தமிழ் நெறிக் காவலர்,தமிழ் நெறிக்குயில்,செந்தமிழ்ச் செம்மல்,செந்தமிழ் வாணர்,திருக்குறள் மணி போன்ற விருதுகளும் அடங்கும்.

மேலும்,அவரது படைப்புகளுக்காக தமிழ் நேசனின் “பவுன் பரிசு”,மலேசிய தமிழ் எழுத்தாளர் சங்கத்தின் “பொற்கிழி பரிசு”,செந்தமிழ் கலா நிலைய சுவாமி இராமதாசர் வழங்கிய “கேடயப் பரிசு”மற்றும் மலேசிய தமிழ் எழுத்தாளர் சங்கங்களின் பேரவை வழங்கிய “கேடயப் பரிசு” உட்பட பல பரிசுகளையும் அவர் பெற்றிருப்பது அவர் வாழும் காலத்தின் சான்றாக திகழ்கிறது.

“தொல்காப்பிய கடலின் ஒருதுளி” சீனி நைனா முகம்மது

மலேசியாவில் தொல்காப்பியமாகவே வாழ்ந்த மாபெரும் தமிழறிஞர் எனப் போற்றப்படும் இறையருட் கவிஞர் ஐயா சீனி நைனா முகம்மது நாட்டில் தொல்காப்பியத்தை நனி சிறப்புடன் எடுத்துரைக்கும் ஆற்றல் மிக்கவராய் திகழ்ந்தார்.இவரது தொல்காப்பியம் சார்ந்த தெளிவு மற்றும் விளங்களை கேட்டறிந்த தமிழ் நெஞ்சங்கள் இவரை தொல்காப்பியமாக மலேசிய மண்ணில் வாழ்ந்த தொல்காப்பியர் என்றும் புகழ்ந்து உரைப்பர்.

தனது இலக்கியப் படைப்புகளாலும் பங்களிப்பாலும் மலேசிய தமிழ் உணர்வாளர்களின் இதயங்களில் நீங்காத இடம் பிடித்து நிலைத்து விட்ட ஐயா சீனி நைனா முகம்மது 1960கள் முதல் தமிழ் இலக்கியத்துறையில் தன்னை ஈடுப்படுத்திக் கொண்டார்.

சமூகப் பற்றுள்ள கவிஞர் அவர். அவர் ஒரு இலக்கிய கருவூலம். கவிதைப் போராளியாக வாழ்ந்தவர். 

தனது எழுத்துக்கும் வாழ்க்கைக்கும் இடைவெளி இல்லாமல் வாழ்ந்த தமிழறிஞர்.

அமரர் இறையருட் கவிஞர் பாவலர் தமிழறிஞர் சீனி நைனா முகமது மொழிப் புலமையாளர், தொல்காப்பியத்தில் ஆழ்ந்த அறிவு பெற்றவர். சிறந்த இலக்கியவாதி. தமிழ் இலக்கணம், தமிழ் இலக்கியம், போதித்தவர். மொழியியலில் தேர்ச்சி பெற்றவர், நற்பண்பாளர். 

தமிழ் மொழியிலும் இலக்கியங்களிலும் அவருக்கு இருந்த பற்று, ஞானம், சிந்தனை, ஆளுமை நம்மை பிரமிக்க வைக்கிறது. தனது வாழ்நாளின் பெரும் பகுதியை தமிழ் இலக்கிய படைப்புக்களுக்காக அவர் தம்மை அர்ப்பணித்துள்ளார். 

இறையருட் கவிஞராக போற்றப்படும் இவர் வெறும் கவிதையோடு தனது தமிழ்ப்பணியை நிறுத்திவிடாமல் கட்டுரை,சிறுகதை,வானொலி நாடகம் ஆகியவற்றிலும் அஃது நீண்டது.இவரது தனித்துவமான படைப்புகள் உள்ளூர் மட்டுமின்றி தமிழ்நாடு  பத்திரிக்கை மற்றும் இதழகளிலும் பிரசுரமாகியுள்ளது என்பது குறிப்பிடத்தக்கது.

நாட்டின் மூத்த எழுத்தாளர்களில் ஒருவரான இவர் கரும்பன்,அபூபரீதா,இபுனுசைய்யிது,இல்லார்க்கினியன்,நல்லார்க்கினியன் என்னும் புனைப்பெயர்களிலும் தனது படைப்புகளை படைத்துள்ளார்.மேலும்,ஒரு படைப்பாளியாக மட்டுமில்லாமல் இவர் “நம் குரல்” என்னும் இஸ்லாமிய மாத இதழ்,பினாங்கிலிருந்து முன்பு வெளிவந்த மலேசிய நண்பன் நாளிதழ் மற்றும் “உங்கள் குரல்” திங்களிதழ் ஆகியவற்றுக்கும் ஆசியராக இருந்துள்ளார்.

அவர் தலைமைத்துவத்தில் வெளிவந்த உங்கள் குரல்  இதழின் படைப்புகள் மாணவர்கள் உட்பட அனைத்து தரப்பினர்களுக்கு மிகவும் பயனான ஒன்றாக விளங்கியது.இலக்கிய,இலக்கண மரபுகளை எடுத்துரைத்த மிக முக்கியமான இதழாக அது விளங்கியது.

இவரது படைப்புகள் உள்ளூர் மற்றும் வெளிநாடுகளில் வாழும் தமிழ் நெஞ்சங்களிடையே பெரும் வரவேற்பை பெற்றிருந்ததோடு அவை தனிநிகரற்ற விருதுகளையும் பரிசுகளையும் பெற்றிருந்தது என்பது குறிப்பிடத்தக்கது. புதிய தமிழ் புணர்ச்சி விதிகள் எனும் அவரது நூல், இலக்கண புலமைக்கு சான்றாக அமைந்திருக்கும் வேளையில் தொல்காப்பியத்தில் சிறந்த புலமை கொண்டிருந்த சீனி நைனா முகம்மது அவர்கள் எழுதிய தொல்காப்பிய கடலின் ஒரு துளி என்னும் நூலுக்காக கறிகாற்சோழன் விருது பெற்றார் என்பது குறிப்பிடத்தக்கது.

1947இல் செப்டம்பர் 11ஆம் தேதி தமிழகத்தின் கடையநல்லுரில் பிறந்த இவர் தனது 12வது வயதில் மலேசியாவிற்கு புலம் பெயர்ந்தார்.இன்றைக்கு மலேசியாவின் அதிகாரப்பூர்வமான தமிழ் வாழ்த்தாக அவர் வரைந்த “காப்பியனை ஈன்றவளே!காப்பியங்கள் கண்டவளே!’என்னும் தமிழ்வாழ்த்துதான் ஒலித்துக் கொண்டிருக்கிறது என்பது அவரது வரலாற்று புகழின் உச்சம் எனலாம்.

தொல்காப்பியப் பேரறிஞரும் மகத்தான மரபு கவிஞருமான சீனி நைனா முகம்மது தனது 67வது வயதில் ஆகஸ்டு 6ஆம் தேதி 2014இல் இயற்கை ஏய்தினார்.அவரது மறைவு இந்நாட்டில் தமிழ்மொழிக்கும் சமுதாயத்திற்கும் பலவகையிலும் பேரிழப்புதான் என்பதை மறுத்திடலாகாது.

அவரது படைப்புகளும் கருத்தாழமிக்க இலக்கியப் பதிவுகளும் காலத்தால் அழியாத பொக்கிசங்களாகும்.அதனை அழியாமல் காக்க வேண்டியது நம் கடமையாகும்.அவர் நம்மிடமிருந்து பிரிந்துவிட்டாலும் அவரது தமிழ்ப்பணி நம் நினைவுகளை தொடர்ந்து ஆக்கிரமித்துக் கொண்டுதான் இருக்கிறது.

(சிவாலெனின்)